Vuksanović: Otvoreni smo za razgovore, ako stvarno ideološke razlike stavimo po strani, onda to može biti dobra priča

Predsjednica SDP-a Draginja Vuksanović kazala je u intervjuu za Javni servis da je ta stranka otvorena za razgovore sa tročlanom koalicijom, a da li će SDP biti dio vlasti koja će biti sastavljena od tročlane koalicije koju predvode Zdravko Krivokapić, Aleksa Bečić i Dritan Abazović još ne može da kaže.

"Zašto? Iz vrlo jednostavnog razloga. Jer mi za sada znamo da ta koalicija ima većinu od 41 mandat. Nama nije poznato kako su oni zamislili taj budući koncept Vlade. Nama je prvo predočeno da će to biti ekspertska vlada pa nikom nije bilo jasno kako će to da izgleda. Pa je onda bila poruka da će to biti stručnjaci, pošteni ljudi, bez obzira na političku ili bilo koju drugu pripadnost. Ja moram da kažem da država nije igračka, država je jedan vrlo složen sistem koji počiva na tri ključna konstitutivna elementa. To su narod, vlast i teritorija. Možete vi biti na primjer vrhunski ekonomski ekspert, ali je suština da vi morate poznavati politički sistem", kazala je ona i dodala da nijesu do sada razgovarali ni sa tročlanom koalicijom, a ni a DPS-om.

Komentarišući sporazum koji su nedavno potpisali predstavnici tri koalicije, kazala je da je sastavljan upravo od principa koji se nalaze u programu SDP-a.

"I tu nema ništa sporno. Mi ne sumnjamo u dobru volju, ali dozvolite da imamo određenu dozu političke rezerve o tome kako će se taj sporazum sprovoditi u praksi. Jer program pojedinih partija koje su dio vlasti potpuno je suprotan onome što piše u sporazumu. Da budem potpuno konkretna na primjer u sporazumu piše da se neće dirati u državne simbole- zastavu, grb i himnu, a pojedini konstituenti DF-a su svih ovih godina su pričali da će kad dođu na vlast da mijenjaju zastavu, da skraćuju himnu, da organizuju referendum za izlazak iz NATO-a. Ja ne znam u kojem će smjeru to ići, ali dozvolite mi da imam rezervu o tome kako će se implementirati ono što u sporazumu piše i da li će neko jo će sjutra imati 66% vlasti tek tako biti spreman da se odrekne svoje političke ideologije i političkih ciljeva", kazala je.

Ipak dodaje da ukoliko zaista postoji spremnost da se ideološke razlike stave po strani, da se ni u jednom momentu ne dovede u pitanje Crna Gora, a fokus premjestiti na ekonomske teme, onda, kako je rekla, to može ići u dobrom pravcu.

Kako je kazala, SDP pozdravlja sporazum, i dodala da je prije ulaska u novu Vladu važno shvatiti da bi izlazak iz te vlade nakon kratkog vremena bio potez neozbiljan prema građanima, a ukoliko dođe do razloga za izlazak iz te Vlade, onda je to prevara.