Ništa ne osvježava kao ledena limunada, a poželite li je malo “začiniti”, u večernjim satima dodati joj možete i nešto votke, džina ili bijelog ruma te se poigrati sirupima od đumbira, višnje, jagode ili maline.
Ubacite i pokoji listić nane, bosiljka ili grančicu ruzmarina - i dobićete piće kao iz kakvog bara.
No da biste "iscijedili" ono najbolje od limuna, potražite neprskane plodove. Tako ćete moći iskoristiti i koru i dobiti senzacionalan napitak pun ukusa i mirisa. Narežite limune na četvrtine i izmiksajte ih štapnim mikserom pa procijedite sok. Na 10 limuna možete iskoristiti šoljicu šećera i 6 šoljica vode. Sve promiješajte dok se šećer ne rastopi pa čuvajte u frižideru tri dana. Poslužite s ledom i kriškama limuna.
Želite li pak dobiti limunadu koja može duže stajati u frižideru, napravite koncentrat. Trebaće vam 2 šoljice šećera i 2 i po šoljice cijeđenog soka limuna. Zagrijte šećer i polovinu limunovog soka pa miješajte dok se šećer ne rastopi, a sok proključa. Kad se sirup ohladi, pomiješate ga s ostatkom limunova soka i držite u frižideru. Na pola šoljice koncentrata ulijte jednako toliko vode i ubacite koju kocku leda. Koncentrat može stajati do 3 nedjelje u frižideru ili 5 mjeseci u zamrzivaču.
Komentari (0)
POŠALJI KOMENTAR