Filip Knežević (36), za kog se sumnja da je bio pripadnik "kavačkog klana" brutalno je ubijen u utorak Barseloni na ulazu u stan, prenijeli su španski mediji.
Prema izvorima bliskim istrazi koje prenosi španski list La Vanguardia, riječ je o egzekuciji povezanoj sa dugogodišnjim sukobom između rivalskih kriminalnih grupa, "kavačkog" i "škaljarskog klana".
Španski mediji prenose da je španska policija već sumnjala da se radi o osveti i naručenom ubistvu povezanom sa obračunom organizovanih kriminalnih grupa koji se bave trgovinom narkoticima, pranjem novca, iznudom i ubistvima, a njihove sumnje potvrđene su kada je otkriven identitet žrtve, koji se pojavljuje u mnogim policijskim dosijeima širom Evrope.
Odjeljenje za krivične istrage katalonske policije Mossos d'Esquadra nastavlja intenzivnu potragu za napadačem koji je u utorak usred dana u Barseloni brutalno likvidirao Filipa Kneževića.
Kako prenose španski mediji, Knežević je bio direktno povezan sa dvostrukim ubistvom iz jula 2020. na grčkom ostrvu Krf, kada su likvidirani navodni pripadnici škaljarskog klana, Alan Kožar i Damir Hadžić.
Tada je u njih ispaljeno čak 29 metaka, a kao jedan od izvršilaca pominje se upravo Knežević, koji je, prema operativnim podacima, djelovao u ime suparničkog kavačkog klana.
Komentari (0)
POŠALJI KOMENTAR