Zvona Notr-Dama oglasila su se 88 puta za Papu, Ajfelov toranj večeras gasi svjetla

Zvona katedrale Notr-Dam u Parizu zvonila su danas u 11 sati 88 puta u spomen na papu Franja, koji je umro u dobi od 88 godina, a Ajfelov toranj večeras će ugasiti svjetla njemu u čast.

"Osamdeset i osam udaraca za 88 godina života", objavila je služba katedrale. Za papu Franja u katedrali će se služiti dvije mise, u podne i u 18 sati, a u 19 sati održaće se molitveno bdenje, po istom izvoru. U unutrašnjosti katedrale postavljen je velik Papin portret.

Ajfelov toranj gasi svjetla

Ajfelov toranj večeras će ugasiti svjetla u čast pape Franja, rekla je gradonačelnica Pariza Ane Hidalgo, dodajući da će predložiti da se jedno mjesto u gradu nazove po njemu.

Hidalgo je u saopštenju pozdravila Papin angažman za Crkvu koja pruža ruku najranjivijima, to što je postavio ekologiju u središte duhovnih i društvenih preokupacija i njegovo zauzimanje za prihvat izbjeglica. Papa Franjo umro je danas ujutro u Vatikanu u dobi od 88 godina.