Miluša, Mago, Bećo: Ljubavni trougao u Kučima i suđenje za pokušaj ubistva

Priredio: V.J.

Veliki sud Knjaževine Crne Gore 15. avgusta 1879. donio je pravosnažnu presudu br. 58 u predmetu o ljubavnoj aferi s kriminalnim epilogom. Optuženi su Miluša i Mago Petrov, a žrtva je Bećo Vulev.
 
Predmet je vođen pod egidom: Suđenje Miluši, ženi Beća Vuleva, iz Ubala Kučkijeh, koja je šćela udaviti u vodu svoga muža. Evo presude…

------

MILUŠA, žena Beća Vulova s Ubala Kučkijeh, kaže:

Priđe nego sam se prošle jeseni udala za Bećom Vulevim, dođe Mago Petrov, i mene je nudio da ga uzmem, a ja ga šćela uzet nijesam, zašto je on prvu ženu oćerao bio i nije mu bilo dopušteno da se može oženiti.

Ja se udadoh za Bećom Vulevim; i, pošto Mago dobi dopuštenje da se može oženiti, dođe kod mene i reče:

„Đe ti biše oči, što uze tu ukletvu i što se zamače?“

Ja odgovorih, da je suđeno.

Mago se oko mene više puta naklanjao na svaki način, da ubijem Beća pa da njega uzmem za muža. Ja sam ga više puta odbijala i govorila, da je grehota.

On se isto oko mene obakolio bijaše da ga ubijem, i ja mu obećah da ću ga ubit, a tako i on, ako mu đe pod rukom dođe; i još sam mu govorila da je grehota, a on reče:

„Viša je grehota onome te hoćaše ubit vojvodu Marka, nego nama“.

I ja poslije pođoh sa Bećom da kosimo sijeno i plastimo kod Male Rijeke — đe, u veče, kad mrak bi, pođosmo da se kupjemo, i ja ga tiskoh u vodu i gađah ga kamenjima, ali se on izbavi, jer umijaše plivat.

MAGO PETROV, Kuč, kaže:

„Kad sam čuo, da govori Miluša, žena Beća Vuleva — e sam je nagovorio da radi Beća ubiti, a u isto vrijemo i ja, kad mi zapane, i da ga je ona bila u vodu tisla iz prijevarke, pa je Sud uhvatio bio i ona sve pomenuto pokazala pred kapetanom Puśom Tomovim — ja sam onda krenuo da bježim na Cetinje Sudu; pa, ako budem kriv, platiću.

No baš pošto pobjegoh uz planinu, viđoh neke ljude koji me gonjahu, govoreći da se vratim Sudu kod kapetana; a ja im rekoh, da se odmah vrate i kažu Sudu: da pođoh Sudu na Cetnije. Oni se vratiše, i više ne znam što je bilo među njima.

A što kaže Miluša, žena Beća Vuleva, da smo se zdogovarali, da ja ili ona ubijemo Beća, pa da se nas dvoje uzmemo, nije istina; i potpisujem se na smrt, ako se iko nađe da osvjedoči kako je mogao išta na mene poznati, da sam sa Milušom imao zdogovora o ovom nesretnom slučaju te ga je učinila, da se na vatru sagorim.

— VELIKI SUD uzimao je u više puta Maga na ispite, no on jednako odriče, da nije imao zdogovora s Milušom o ubijstvu Vulevu.

Kapetan Puśo Tomov dostavi pismeno: da se Mago navijek vladao pošteno i da niko nije mogao primjetiti, da je naumio s Milušom ubiti Beća, pa da je on uzme za ženu.

Mago je iskao Milušu za ženu priđe, no je on, maloljetan i nejak u životu, dobio dopuštenje da se može oženiti, kao što je to Miluša u svome ispitu očitovala.

S toga Veliki Sud uvidi:

Da je Miluša u sebi bila uvjerena, da će je Mago uzeti za ženu, ako bi se mogla muža osloboditi ma kojim načinom, i da je s toga šćela utopiti Beća, bez ikakvog njegovog povoda ii pogreške. Po tome presudi da se Bećo može oženit sa drugom ženom. A Mago položi kletvu, da on nije imao nikakva zdogovora s Milušom da ubije Beća, te se…

- Mago OSLOBODI TAMNICE I SVAKE KAZNE, pošto je ostojao dva mjeseca dana u tamnici

- a Miluša, zašto je šćela utopiti svog zakonitog muža u vodu, da OSTOJI TAMNICE ŠEST GODINA, računajući zatvor od 12. juna 1879.