Knjiga „Sidrišta u vremenu – Govori i razgovori (2003-2023)“ književnika, profesora i doskorašnjeg predsjednika Matice crnogorske, te sadašnjeg urednika časopisa „Matica“ Dragana Radulovića, biće promovisana sjutra u 19 sati u Akademiji znanja u Budvi (Ulica Žrtava fašizma br. 56).
Ovaj zbornik sabranih tekstova i intervjua Matica crnogorska je objavila u saradnji sa Nacionalnom zajednicom Crnogoraca Hrvatske. Na promociji će, pored autora, govoriti urednik izdanja, politikolog Dragutin Lalović, publicista Marko Špadijer i generalni sekretar Matice crnogorske Ivan Ivanović.
Knjiga „Sidrišta u vremenu – Govori i razgovori (2003-2023)“ je presjek Radulovićevog književnog i društvenog angažmana u javnom diskursu crnogorskog društva u naznačenom vremenskom okviru. Prema riječima recenzenta Marka Špadijera, Dragan Radulović je imao mnogo izazova u crnogorskoj društvenoj zbilji na koje je smatrao da treba javno da reaguje i iznese svoje mišljenje i stavove organizacije koju je vodio.
– Radulovićevi eseji su sadržajni, konkretni, ubjedljivi i stilski rafinirani. S očiglednim ponosom i sigurnošću što istupa kao građanin i u ime jedne institucije, u čije poštene i ispravne ciljeve duboko vjeruje, bio je oštar i nepotkupljiv kritičar društvenih anomalija – zapisao je Špadijer u tekstu pod nazivom „Ako nema slobode za sve, nema ni za koga.“
Prema riječima urednika Dragutina Lalovića, ova knjiga je svjedočanstvo o tome sa čime su se Matica i njezin tadašnji čelnik, a s njom i cjelokupno crnogorsko društvo, suočavali na evropskom putu, još uvijek trnovitom i u uslovima formalne državne suverenosti.
– O tom suočavanju, programskom i političkom, svjedoče u ovoj knjizi sabrani govori, prigodna saopćenja i brojni intervjui Dragana Radulovića, bez kojih uopće nije moguće primjereno razumjeti smisao i domete djelovanja Matice crnogorske u oblikovanju sebe same kao kulturnog pokreta, a preko toga i crnogorskog društva u desetljeću 2013–2023 – zapisao je Lalović.
Komentari (0)
POŠALJI KOMENTAR