U sjedištu Svjetske zdravstvene organizacije (SZO) u Ženevi danas je počeo sastanak eksperata, na kojem će odlučiti da li će biti proglašeno globalno vanredno stanje zbog epidemije novog koronavirusa, koji se širi iz Kine.
Nezavisni eksperti, njih 16, iz oblasti kontrole bolesti, virologije, epidemiologije i razvoja vakcina održavaju novi sastanak iza zatvorenih vrata, nakon što u srijedu nijesu donijeli odluku, prenosi Rojters.
Kineski zvaničnici za oblast zdrastva održali su prezentaciju putem telefonskog konferencijskog poziva i dopustile da tim SZO uđe u tu zemlju i dostavi izvještaj ekspertskom panelu.
Nakon procjene da li ima dokaza da se virus prenosi sa čovjeka na čovjeka i drugih faktora, eksperti će uputiti preporuku direktoru SZO Tedrosu Adhanu Gebrejesusu, koji će donijeti konačnu odluku o tome da li da bude proglašeno vanredno stanje.
"Odluku o proglašavanju vanrednog stanja shvatam izuzetno ozbiljno", rekao je Gebrejesus i dodao da je spreman da je donese samo uz odgovarajuću količinu razmatranja i informacija.
Ukoliko se to dogodi, to će biti šesti put da se proglašava vanredna situacija na međunarodnom nivou tokom posljednje decenije.
Komentari (0)
POŠALJI KOMENTAR