Boris Tadić: Pobijedio bih Vučića u TV duelu za sat

Nekadašnji predsjednik Srbije Boris Tadić izjavio je da "Ćacilend nije samo izraz Vučićeve nemoći, već istovremeno sramoćenje Srbije", navodeći da su "te cirkuske šatre ispred Predsjedništva do kraja ogolile karakter ove vlasti, uz ukazivanje da "13 godina gledamo cirkuske predstave, a sada je to konačno i otjelotvoreno u Ćacilendu".

"Posebno je skandalozno to što svaki put kada režim prikazuje kako su plaćeni ljudi u Ćacilendu životno ugroženi napadima, umjesto da sklone te ljude, oni se hvale time kako je to 'zona slobode'. Dakle, takvim ponašanjem ne samo da režim kroz Ćacilend pokazuje svoj cirkuski karakter, već i ogroman kukavičluk u kom se predsjednik države hvali kako ti plaćeni mučenici rizikuju život za njega", rekao je Tadić, lider Socijaldemokratske stranke Srbije (SDS), u intervjuu za Danas.

On je istakao da predsjednika države Aleksandra Vučića godinama poziva na televizijski duel.

"To je od izuzetnog značaja, jer je ovaj režim ustoličen na lažima na račun naše vlasti. Kada nekog 13 godina optužujete za sve probleme u zemlji i iznosite notorne neistine, onda dugujete građanima da čuju i drugu stranu. Dakle, ne duguje on taj duel meni, nego našoj javnosti kojoj svakodnevno iznosi jednostrane optužbe na račun mene i vlasti koju sam predstavljao. I u tom duelu ne bih učestvovao kao predsjednik političke stranke, već kao bivši predsjednik Srbije", naveo je Tadić.

Kako je dodao, ako Vučić "13 godina za sve krivi bivšu vlast, neshvatljiv je kukavičluk da bježi od duela sa bivšim predsjednikom".

"A bježi, jer zna da bi u sat vremena sve laži pale kao kula od karata. A ta kula je jedan od ključnih stubova ove vlasti", kazao je Tadić.

Na pitanje šta bi kao nekadašnji predsjednik Srbije posavjetovao studente, rekao je da im ne bi dijelio savete, pogotovo ne preko medija, ali im stoji "na raspolaganju sa svojim iskustvom i pobjeda i poraza".

"SDS je odmah javno izašla sa stavom da im stojimo na raspolaganju i pružamo punu podršku", ukazao je Tadić.