Oglasio se mladić koji je iščupao kablove Vučiću: Kabadahijo, dosta te...

Vanredno obraćanje predsjednika Srbije Aleksandra Vučića na RTS-u sinoć je u jednom trenutku prekinuto.

Ekran RTS na kratko se zamračio, jer je došlo do kratkog prekida signala koji je izazvala za sada neimenovana osoba namjernim izvlačenjem strujnih kablova iz vozila za satelitsko emitovanje.

 Kako pišu srbijanski mediji anonimni "čupač kablova" je opisao kako je akcija izgledala.

U nastavku, njegovu poruku prenosimo integralno:

„Gledam na netu svi pišu o tome kako vrhovni kabadahija ponovo ima neku vanrednu konferenciju, na kojoj će ponovo da ispira ljudima mozgove širom Srbije. Razmišljam o tome kako većina mojih prijatelja više i ne gleda televiziju i ne prati vijesti jer im se bukvalno diže kosa na glavi na sam pomen šefa mafije i koliko nam je svima više dosta njegovog davljenja i prenemaganja. Skapiram da mi se Predsjedništvo nalazi na putu i sjetim se da bih opet mogao da izvučem kablove reportažnom kombiju Pinka kao prije jedno pola godine kada sam se opet našao na pravom mjestu u pravom trenutku. Bukvalno mi je u glavi bilo to je dobar trenutak samo bar malo da ih nerviram, samo malo da im se odužim za svu onu torturu kojom smo svakodnevno izloženi“.

I gle čuda i moje sreće na mjestu su se ovaj put našla dva kombija, pored Pinkovog tu je bilo i vozilo naše drage nam okupirane i praktično privatizovane Radio televizije Srbije. Prvo sam prišao Pinkovom vozilu izvukao kabl bacio ga što dalje od vozila, nakon toga sam prišao kombiju RTS i uradio istu stvar, okrenuo se i nastavio svojim putem kao da se ništa nije desilo. Tek poslije nekih sat vremena sam vidio koje su razmjere samog čina i moram vam priznati da sam zbog toga za razliku od SNS poltrona i ulizica sa jednim velikim osmjehom na licu legao da spavam.

Koristim ovu priliku da pozovem sve hrabre ljude koji rade u okupiranim insitucijama da se uključe u sabotaže i slobodno okrive za to neimenovanog čupača kablova. Da bismo promijenili ovaj sistem moramo svi pomalo da ga nagrizamo sa svih strana. Što se tiče vlasti, nek im se tresu gaće, nek se plaše i razmišljaju iz kog ćoška ili mraka će iskočiti neki neimenovani gospodin ili gospođa. Do pobjede. Srdačno, vaš neimenovani čupač kablova", piše Direktno.rs. koji su naznačili da je identitet osobe koja je iščupala kablove poznat njihovoj redakciji.